पालघर : रूपाली वरठा या मुलीला तन्वी धनवा या योजनेच्या माध्यमातून नुकतेच अर्थसाह्य करण्यात आले. पालघर जिल्हा परिषदेच्या मुख्य कार्यकारी अधिकारी निधी चौधरी यांच्यामार्फत ही मदत सुपूर्द करण्यात आली. जनसंपर्क अधिकारी मनीषा निरभवणे यांनी ही माहिती दिली.
रूपाली वरठा या नऊ वर्षांच्या मुलीला जिवंत वीजवाहिनीचा झटका लागून, ती अत्यंत गंभीरत्या जखमी झाली होती. तिच्या परिवाराची आर्थिक परिस्थिती हलाखीची आहे. त्यामुळे या घटनेची आणि रूपालीच्या वेदनांची दखल घेऊन पालघर जिल्हा परिषदेच्या ‘तन्वी धनवा’ योजनेअंतर्गत तिला १५ हजार रुपये देऊन तिला मदत करण्यात आली आहे. स्वतः मुख्य कार्यकारी अधिकारीही वेळोवेळी संबंधीत डॉक्टरांकडे तिच्या प्रकृतीची विचारपूस करतात. समाजसेवेच्या भावनेतून अनेक पत्रकारांनीही रूपालीला मदत केली आहे. मुख्य कार्यकारी अधिकाऱ्यांनी अशा संवेदनशील भावनेतून काम करणाऱ्या सर्व जणांचे आभार मानले आणि रूपाली लवकरात लवकर बरी व्हावी, अशी सदिच्छा व्यक्त केली.